Ова е единствен факултет во земјава (приватен или државен), акредитиран од Министерството за образование и наука што нуди можност за студирање со нула денари трошок сè до дипломирањето и вработувањето на студентите, преку програмата „Студирај сега, плаќај по вработување“
На Светскиот ден на учителите, првиот практичен ИТ-факултет во земјава, „Бреинстер некст колеџ“ (Brainster Next College) ги отвори вратите за првата генерација студенти што ќе учат софтверско инженерство и иновации по најсовремени студиски програми и од искусни професионалци. Ова е единствен факултет во земјава (приватен или државен), акредитиран од Министерството за образование и наука што нуди можност за студирање со нула денари трошок сè до дипломирањето и вработувањето на студентите, преку програмата „Студирај сега, плаќај по вработување“. Првата генерација студенти на првиот академски час ги поздравија дел од професорите, административниот кадар. Сите им го дадоа истиот совет на бруцошите: „Многу учете, прашувајте, бидете љубопитни и ќе постигнете големи нешта!“.
Петар Ниновски
Петар Ниновски, основачот на „Бреинстер“ и на „Бреинстер некст колеџ“ им рече дека ќе се соочат со многу предизвици, многу поминато време во учење, но и многу можности кои ќе треба да ги искористат.
– Од ова не треба да се плашите, бидејќи ние ќе бидеме со вас, да ве поддржуваме во секој чекор. Она што можам да ве советувам е да учите многу, да им помагате на колегите, да бидете љубопитни, да прашувате. Почнувате нова фаза во вашиот живот, се надевам дека заедно ќе постигнеме големи работи. Од вас очекуваме многу иновациии со кои ќе правите промени во општеството – рече Ниновски.
Генералниот менаџер на факултетот, Александар Клашниновски истакна дека сите предизвици ќе ги решаваат заеднички, за после многу години, првата генерација на студенти да биде горда на успесите.
Александар Клашниновски
– Фокусирајте се на три важни работи во оваа фаза од животот. Иако треба да сте технички спремни, важно е да научите да ги развивате и меките вештини (soft skills). Да знаете да комуницирате, презентирате, да работите тимски со луѓе со кои не сте компатибилни. Тоа ќе ве издвои од останатите. Важно е да научите да градите врски со вашите колеги, со други личности, бидејќи во животот ништо не можете да направите сами. Потребна е мрежа на луѓе со кои заедно ќе напредувате. И трето, уште од сега е важно да имате мајндсет на растење. Тоа значи дека од денеска, па натаму ќе учите, но важно е да разберете дека учењето никогаш не треба да престане. Само вака ќе бидете чекор напред – им рече Клашниновски на новите студенти.
Првата генерација студенти ги поздравија и неколку алумни од академиите на „Бреинстер“, основачот на факултетот, од каде што ќе се пренесат сите позитивни образовни практики, како работата на реални проекти, практична настава и менторски пристап на наставниот кадар. Тие ги охрабрија студентите и им кажаа дека не е лесно да се учи програмирање и да се совладуваат ИТ-вештините, но дека овие програми ќе ги подготват добро за работата во домашни и странски компании.
– Работата на реалните проекти ја дава сликата за она што ќе се соочите на работа. Треба да се вложува многу труд и време, но верувајте дека вреди – им порача Карла Биков, алумни од Академијата за Full-Stack програмирање која сега работи како програмерка.
Професорот Петар Јолакоски кој предава линеарна алгебра посочи зошто е важно да се учи математика, како дел од наставната програма колеџот. Според него, ако не се учи овој предмет, тоа прави огромна дупка во знаењето на студентите што сакаат да се насочат кон машинско учење и науката за податоци.
– Ние нема да го учиме овој предмет сувопарно. Јас успеав да направам програма, односно предметот целосно да биде имплементиран во програмскиот јазик „Пајтон“ и со тоа целосно ќе научите да манипулирате со податоци – рече Јолакоски.
Професорот Ивица Пешовски потенцираше што значи да се биде инженер и зошто овој збор носи многу голема тежина.
– Сигурно познавате лекари што не се вистински лекари, или архитекти што не се архитекти. Да се биде инженер значи да се поседува знаење, а тоа се постигува само со учење. Ние заедно ќе ги научиме сите работи што ви се потребни за да станете инженери и да се гордеете со тоа. Ќе треба да дадете многу време, многу труд и за 3 години ќе бидете сосема други личности. Општеството ќе бара од вас, ќе очекува од вас да го потврдите тоа што сте го научиле – им рече Пешовски на студентите.
Наставата „Бреинстер некст колеџ“ ќе биде со физичко присуство. Во сржта на факултетот се праксата и реалните проекти, што ќе се овозможат преку соработката со локалната и глобалната ИТ-индустрија. Неговите партнерски компании ќе нудат и вработување за студентите.
